Suma daga verður maður bara að dást að fáránlegum hlutum sem fólki getur dottið í hug að gera. Í dag, því miður, voru þessi heimskupör ekki af skemmtilega furðulegum toga.

Það er frekar lítið að gera í vinnunni hjá mér þessa dagana þannig að ég las mbl.is nokkuð vel.

Fólk á Papúa Nýju-Guíneu er farið að grafa HIV smitaða ættingja sína lifandi þegar þeir geta ekki lengur hugsað um þá.
Ég skil að fólkið geti ekki hugsað um fársjúka deyjandi ættingja sína en ég get ómögulega séð fyrir mér af hverju lausnin er að grafa þá lifandi. Hrrr... þetta er svo hræðilegt. Ég persónulega myndi finna leið til að deyða ættingja mína áður en ég myndi grafa þá ef ég væri í svona stöðu. Um daginn las ég grein í Brigitte blaði þar sem var verið að fjalla um ungbarnamorð á stúlkubörnum í afskettum þorpum í Indlandi þar sem mæðurnar fremja verknaðinn þannig að ekkert sjáist á barninu.

Svo er það furðufrétt dagsins:
Í Þýskalandi hefur kona ein kært mann og bróður hans fyrir nauðgun og aðstoð við nauðgun.  Köllum bræðurna til skýringar  Heinz og Klaus og konuna Önnu. Anna á sambandi við Heinz en af einhverjum óþekktum ástæðum treystir Heinz sér ekki til að fullnægja kynferðislegum þörfum hennar í svefnherbergin og þorir ekki að segja henni frá óöryggi sínu. Hann bregður því á það ráð að fá Klaus, eldri bróður, sinn til að gegna þessum skyldum fyrir sig án vitneskju Önnu og hylma þeir yfir þessa klæki með því að slökkva ljósin og klósettferðum. 

Aumingja konan þegar hún fattaði hvað var um að vera en ég verð nú samt að segja að ég hef þurft að hugsa mig töluvert um hvort þetta sé nauðgun. Jú það er það... en þetta er nú samt næstum of fáránlegt til að vera satt.  

Ég veit að titillinn hljómar hræðilega óspennandi. Þetta blogg er nú aðallega til komið vegna þess að fyrrverandi rekstrarhagfræðikennari og deildarforseti úr Háskólanum á Akureyri komst í blöðin í gær fyrir það að hafa ráðið sig í starf hjá tölvuleikjafyrirtæki sem yfirhagfræðingur í sýndarveruleika.

Mér finnst þetta mjög athyglisvert. Í fyrsta lagi bjóst ég ekki við þessu af Eyjólfi. Hefði hann verið ráðinn yfirhagfræðingur Hafrannsóknarstofununnar hefði ég ekki veirð hissa en EVE-online er aðeins öðruvísi. En þetta er vissulega stórt og mikið hagkerfi. En hvort endilega þurfi doktor í auðlindahagfræði til að fylgjast með því skal látið liggja á milli hluta. Ég ætla nú að játa það til að koma í veg fyrir að einhver misskilji þessa færslu sem háðung að fljótlega eftir að ég sá þetta datt mér í hug hvort ekki þyrfti einhvern til að reikna út framleiðsluverðsvísitölu í EVE-online. Sennilega getur Eyjólfur dundað sér við það að fylgjast með tiltölulega ungu hagkerfi stækka og mótast og rannsakað eiginlega eins og mannfræðingur hvernig viðskipti þar ganga fyrir sig, jafnvægi er náð o.s.frv. Um það er sennilega hægt að skrifa marga lærða pappíra í virt fræðirit ef maður hefur nennu til. 

Reyndar gæti ég, í fyllstu alvöru, líka skrifað lærða pappíra í virt fræðirit um það sem ég er að gera í vinnunni... ef ég bara nennti að leita að og lesa einhverjar fræðilegar heimildir.  

Ég horfði á sjónvarpsfréttirnar áðan. Ég var nú alveg hlessa á því að hann Edward H. Huijbens skuli standa fyrir þessu mannréttindabroti, sem ég vil kalla, sem á að fara að fremja á Akureyri. Ef einhverjir geta haldið því fram að það að skjóta upp flugeldum um áramót séu mannréttindi get ég alveg eins haldið fram að það séu mannréttindi að fá að tjalda um verslunarmannahelgina á tjaldsvæði á Akureyri alveg sama hversu gamall, eða í þessu til felli, ungur maður er, og vil ég trúa því að ég hafi meira fyrir mér en flugeldafólkið í þessari staðhæfingu minni. Ég er samt mjög lögfróð manneskja.
Mér finnst þetta eiginlega fyrir neðan allar hellur. Að banna 18-23 ára fólki að tjalda! Af hverju? AF því að það er líklegt til að vera með læti? Einhvern veginn grunar mig að Zorró hafi verið með meiri læti en ég á tjaldsvæðinu á Borgarfirði á Álfaborgarséns um árið. Mér finnst þetta bara fáránlegt. Þetta er bara eins og með mótorhjólamennina. Meirihlutinn er ágætur en auðvitað eru alltaf einhver skemmd epli inn á milli. Ég á bara ekki orð til lýsa hneykslun minni þessa stundina.

Ég las líka inni á mbl.is í dag að ekki hefði heyrst mikið jákvætt um Strætó undanfarna mánuði í fréttum (mikið virðist ég orðin fréttaþyrst). Sé ég mig knúna til að taka upp hanskann fyrir Strætó og skrifa smá sem ekki allt er slæmt.
Í fyrsta lagi er það að nýja leiðakerfið virkar bara helvíti vel fyrir mig. Ég get ekki kvartað. Ég er ekki nema 45 mínútur í vinnuna núna og ef ég flýti mér get ég verið 40 mínútur heim. Þarf hvergi að bíða í meira en 5 mínútur og skipti þó tvisvar um vagn. Þarf aldrei að bíða lengur en 20 mínútur eftir einhverjum vagni þegar ég er búin í vinnu og hverfisvagnarnir hafa alltaf nema einu sinni í sumar beðið eftir S1 sem er mikil framför frá því í fyrrasumar.
Lengi má gott bæta. Ég hef samt mínar efasemdir um það að setja upp skilti með nöfnum stoppistöðva og leyfa kaffidrykkju í vögnuum sé það sem brýnast liggur á. Að nefna stoppistöðvarnar er svosem ágætt framtak en gagnast afar takmarkað nema nöfnin komi líka inn á áætlanir og helst inn í vagnanna þannig að sjáist hvað sé næsta stoppistöð. Ég held að það sé ekki að fara að gerast.
Og kaffadrykkja? Með því aksturslagi sem tíðkast hjá sumum bílstjórnunum gæti þetta orðið hættulegt. Auk þess sem þetta mun bara auka á rusl í vögnunum og sóðaskap. Ég er ekki hlynnt þessu. Þetta er það sem ég myndi leggja til að yrði gert.

Ø       Lækka fargjöldin niður í einhverjar eðlilegar fjárhæðir. T.d. 200 kr. fyrir fullorðna og 50 kr. fyrir börn. Og láta bílstjórana hafa nokkra hundrað- og fimmtíukalla til að gefa til baka. Ég meina 280 kr. er fáranlega hátt og heimskulegt að hafa þetta ekki á sléttu hundraði eða hálfu.

Ø       Fjölga ferðum. En það kemur sennilegast með haustinu og skólunum (eða það ætla ég rétt að vona allavega á álagstímum).

Ø       Skikka Teit Jónasson og Hagvagna sem reka Strætisvagnana í Kópavogi og Hafnarfirði til þessa að lappa upp á bílaflotann og leggja þeim bílum sem hanga saman á einangrunarteipi og sprengja hljóðhimnurnar í þeim sem í þeim sitja og verða fyrir því óláni að vera nálægt þegar þeir keyra framhjá. Strætó í Reykjavík er algjör lúxus. Ekki nóg með að fæturnir komist fyrir án vandræða heldur líða bílarnir nánast hljóðlaust um göturnar, vaggja kannski örlítið mjúklega og sætin eru mjúk.

Ø       Setja upp system þar sem hægt er að sjá á skjá fremst í bílnum hvaða stoppistöð er næst – eins og í lestum í útlöndum!

Ø       Gera atvinnurekendunum kleift að útvega starfsmönnum sínum strætókort og draga kostnaðinn frá skatti (eins og bílastyrk!).

Ø       Bjóða upp á dagskort fyrir ferðamenn.

Ø       Hafa frítt í hverfisvagna í Hafnarfirði (allavega)

Ø       Hafa frítt í strætó!